أبريل .. شهر الشلخ العالمي !

 بسمـ الله الرحمن الرحيم

الحين بدا أبريل و بدا الشلخ !

أول شي .. سوري يعني لرفيقاتي  بــس الحق حق .. صح ولا لا ؟

جذبة أبريــل هالسنة صراحة واجد أحسها زادت عن حدها
في  1 /4 يمكن شلخوا علي أكثر من 10 مرات .. من قعدت من النوم
و اني حاطة في بالي ان اليوم 1 أبريل و مستعدة اني اسمع هالشلخ ..
و تقريباً أغلبها هرار و مزح ع الخفيف ما تتصدق
بـس مثل جذبة رفيقتي ما جفت ! حتى عيوني دمعت ..
بعدين آخر شي شنو .. جذبة أبريل !
و اللي قاهرني أكثر انهم مستانسين و كل شوي ما قالوا ” بالعكـس عجيييب ” !
و يقعدون يخططون عشان يشلخون على بنات غيري !

يااا ناااس يااا عالم !
شصاير فيكم ؟
و شقولون بعدين ! لا احنا ما نقلد الغرب و هذا شي عادي ..
يلا Have fun  شورانا !

اني ما بجي و بقول لكم .. لا ماما ترى الجذب حرام و اللي يجذب الله يوديه النار
اتوقع هالكلام ولا مليون مرة سمعتونه !
يا ناس ..  احنا عندنا قيم و عندنا دين اذا ما حطينه لهم اعتبار يعني احنا خلاص ضعنا
اذا شي تافه و سخيف وووو …. و نقول يلاا خلنا نستانس ..
الاشياء الباقي شبنقول عنها !
شنطلع احنا اذا طول عمرنا نردد .. احنا ما نقلد الغرب و لا ننجر و رى ثقافاتهم  !
و احنا اليوم قاعدين ناخذ احقر شي عندهم و نسويه ..
و بعد تقولون ما عندنا ( تقليد أعمى ) !

الحين شسالفة ( كذبة أبريل ) .. !

قبل 1200 سنة تقريباً .. كانت اسبانيا مثل ما تعرفون يحكومونها المسلمين و الغرب ذاك الوقت النصارى تحديداً سووا خطه عشان يسقون هالولاية الاسلامية .. فقاموا يرسلون لهم  خمور و سجائر عشان ينقادون اقتصادياً لهم .. فبعد جم سنة بس .. صارت اسبانيا منقادة لهم .. ليمااا سقطت غرناطة في أول أبريل و ظلوا الغرب يسمون هالحدث
( خدعة أبريل ) !

>> هذا على حسب ما سمعته من معملة الاجتماعيات صف 5 ابتدائي و من نشرة قريتها اليوم في المدرسة :D

يعني احنا الحين شقاعدين نسوي .. غير نحتفل بهزيمتنا !
معقولة هالشي احنا نسويه و ما ندري بروحنا ! جوفوا التقليد بس لوين موصلنا ..
غباء و قلة ثقافة و الأعظم منه عدم مبالاة !
يعني تجوف الناس تجذب هالجذبة و مخططه لها تخطيط
شلون بتبدي .. شلون بتكملها و حتى متى تقول إنها ( جذبة أبريل ) و إلا أمــــزح !
أو مثل ما يسمونها غيرهم .. جذبة بيضة لا أكثر و لا أقل !
و في الأشياء الأهم و الأهم .. تلاقيهم حتى ما يعرفون شلون يفكرون !

تدرون جم واحد مات بسبب هالشي اللي تسمونه مزحة !
و لا على الاقل جم واحد تأثر منها !
في احصائيات تقول إن أكثر رواد المستشفيات النفسية تصير في شهر أبريل !
و إن سكان قارة أمريكا ينفقون 250 مليون على هاليوم !
يعني جوفوا لأي درجة تفاهة هالنــــاس ..

ما بطول .. بس إللي فوق كله يتلخص في كلمتين ( الجذب حرام )
قال تعالى : { إنما يفتري الكذب الذين لا يؤمنون بآيات الله وأولئك هم الكاذبون}
[ النحل / 105 ]
و هالشي ما نقدر نتناقش فيه !
على قولة بعض الناس ( 1 أبريل / يوم الحمقى ! ) ! 

لحظة بروح فوق شوي بجوف شكتبت واهاهاهاهاهاها چني أكتب تعبير للمدرسة خخخ بس خلاص ما بمسح شي

بعيداً كل البعد عن اللي فوق !

1- اليوم صار عمر My Blog شهرين بالتمام و الكمال
2- سؤال جا على بالي الحين .. في أحد هني أصغر مني ؟
3- متى معرض الكتـــاب ؟
4- متباركين بمولد مبعث الرسالة وخاتم الأنبياء والمرسلين محمد ( ص )

في أمــان الله